| Зінкевіч Валерый Анатольевіч г. Браслаў, Віцебская вобласць 1964 г.н. |
Зінкевіч Валерый Анатольевіч нарадзіўся ў 1964 годзе. Скончыў мастацка-графічны факультэт Віцебскага педагагічнага інстытута. Ганчарствам пачаў займацца з 1993 года, пасля таго, як скончыў курсы па ганчарству пры Віцебскім АМЦНТ. Зараз працуе мастаком НДУК ”Браслаўскае раённае аб’яднанне музеяў“.
За час творчай працы майстрам народных мастацкіх рамёстваў зроблена больш за тысячу работ. Займаецца вырабам рэплік керамічнага посуду часоў жалезнага веку, ранняга і позняга сярэднявечча. а таксама этнаграфічнага ганчарнага посуду Браслаўшчыны. Працуе з мясцовай глінай, выкарыстоўвае механічнае ганчарнае кола для этнаграфічнай керамікі і прымітыўны ганчарны станок з нерухомай драўлянай воссю для ляпнога посуду. Самастойна аднавіў тэхналогію аплятання гаршкоў бяростай.
Валерый Анатольевіч з’яўляецца пастаяным удзельнікам раённых, абласных, міжнародных фестываляў, святаў-конкурсаў, выстаў: IХ Рэспубліканскага фестывалю-кірмашу народных мастацкіх рамёстваў ”Вясновы букет“ (г.Мінск, 2017 – 2019 гг.); кірмашу рамёстваў ”Горад майстроў“ у межах Міжнароднага фестывалю мастацтваў ”Славянскі базар у Віцебску“ (2017 – 2019 гг.) і інш. Прымаў удзел у аднаўленні традыцыйных зімовых строяў Браслаўшчыны, быў лаўрэатам конкурсу ”Сцяжкі майстэрства“ ў намінацыі ”Рэканструкцыя лакальных адметнасцяў верхняга адзення сялянскага строя“.
Акрамя гэтага майстар народных мастацкіх рамёстваў грае на дудзе, гуслях. Займаецца вырабам гусляў, гудкоў, акарын.
Шырока вядомы як майстар-рэканструктар у Беларусі, Польшчы, Расіі, Літве, Латвіі. Выязджае на фестывалі і працу ў гэтыя краіны.
[ngg src=»galleries» ids=»53″ display=»basic_thumbnail» thumbnail_crop=»0″]