ДУК ”Бешанковіцкі раённы цэнтр культуры“
Ансамбль ”Званіца“ быў створаны на базе Бешанковіцкага раённага Дома культуры ў 2001 годзе. Назва калектыву выбрана невыпадкова – галасы ўдзельнікаў, як званы званіцы, могуць і радаваць слухачоў падчас свята, а могуць і прымусіць сумаваць, такім чынам перадаваць самыя розныя эмоцыі і пачуцці.
Першым кіраўніком ансамбля была выпускніца Беларускага інстытута культуры Наталля Эдуардаўна Бондар. Найменне ”ўзорны“ было прысвоена калектыву ў 2005 годзе. З 2018 года ансамблем кіруе Дзіяна Юр’еўна Сінкевіч, якая скончыла Віцебскі дзяржаўны каледж культуры і мастацтваў.
У склад калектыву ўваходзяць 10 дзяўчат школьнага ўзросту. Удзельнікі вызначаюцца добрымі музычнымі здольнасцямі і неблагімі галасамі. Паспяхова асвойваюць двух-трохгаласавыя партытуры.
Ансамбль працуе ў жанры фольк-стыль. Народныя песні ў аранжыроўцы набываюць зусім новае, свежае гучанне і асаблівы каларыт. З 2001 года аранжыроўкамі песень займаўся акампаніятар раённага цэнтра культуры Анатоль Харкевіч. Зараз яго справу працягвае акампаніятар Міхаіл Буракоў.
Мэта працы калектыву: захаванне нацыянальнага здабытку – беларускай народнай песні, прапаганда беларускага фальклору сярод падрастаючага пакалення, выхаванне юнага слухача на лепшых узорах нацыянальнай музычнай культуры. Праз народную песню дзеці далучаюцца да культуры свайго народа, праз уключэнне іх у традыцыйную народную вакальную дзейнасць адбываецца рост іх духоўнасці.
Аснову рэпертуару складаюць беларускія народныя песні і творы, напісаныя ў стылі ”фольк“. Нягледзячы на тое, што мэтай калектыву лічыцца вывучэнне і засвойванне нороднай песеннай спадчыны, ёсць спроба выконваць тэатральныя і харэаграфічныя нумары.
Калектыў – актыўны ўдзельнік раённых і абласных мерапрыемстваў.
У 2017 годзе ансамбль фольк-стыль ”Званіца“ прадставіў канцэртную праграму ”Шлях з вараг у грэкі, ці легенда аб затанулых якарах“, якая з поспехам была прадаманстравана гледачам на раённай сцэне. У праграму былі ўключаны беларускія народныя песні ”За гародам кароў пасла“, ”Куры“, ”Ой, вакол Ульянкі“ a-capella, а таксама аўтарскія творы. Былі выкарыстаны элементы пабытовых танцаў, загаворы, адбылася прэзентацыя рэгіянальных народных касцюмаў хлопца і дзяўчыны, рэканструяваныя майстрам Алесяй Аўчыннікавай.
У 2019 годзе ”Званіца“ прымала ўдзел у нацыянальным тэлевізійным конкурсе юных талентаў ”Сузор’е надзей“.
Ансамбль – лаўрэат ІІ ступені Міжнароднага конкурсу фальклору і рамёстваў ”Смоленский рожок“ (г.Смаленск, 2019 г.).
У 2020 годзе ансамбль падрыхтаваў і правеў калядны абрад ”Калядная зорка“, а таксама прыняў удзел у XIIІ абласным аглядзе-конкурсе фальклорнага мастацтва дзяцей і моладзі ”Ад прашчураўда зор“ у Расонах.