ДУК ”Лепельскі раённы Дом культуры“
Клуб ”Кругаверць“ быў створаны ў 1990 годзе на базе фальклорнага калектыву вуліцы Садовай горада Лепеля. У калектыве, які стаў вытокам ”Кругаверці“, усяго было чатыры жанчыны: Марыя Ламека, Ганна Тарнаўская, Зінаіда Стэльмах, Праскоўя Дуброўская. Гэты невялічкі гурт увабраў у сябе рознаквецце традыцыйных спеваў Лепельшчыны. Падчас стварэння клуба ”Кругаверць“, акрамя жанчын, у яго увайшлі падлеткі i моладзь, якія цікавяцца традыцыйнай народнай культурай. Ступень валодання мясцовай традыцыяй аказалася настолькі яскравай, што жанчыны былі запрошаны ў Маскву для ўдзелу ў фальклорна-этнаграфічным канцэрце, што адбыўся ў Саюзе кампазітараў СССР.
У поўнай меры раскрыў творчыя магчымасці жанчын вядомы беларускі музыколаг З.Я.Мажэйка. Фальклорны гурт быў запрошаны для ўдзелу ў здымках навукова-папулярных фільмаў – ”Галасы вякоў“, ”Прынясі, Божа, хмару“ i ”Крывыя вечары“.
Песні гурта гучалі на радыё і абласным тэлебачанні. У 1994 годзе гурт быў ўдзельнікам І міжнароднага фестывалю на Беларусі, які праходзіў у горадзе Пінску.
У 1996 годзе калектыву было прысвоена ганаровае найменне ”народны“.
У 1997 годзе фальклорны клуб атрымаў званне лаўрэата на фестывалі народнага мастацтва Беларусі ”Беларусь – мая песня“. У гэтым жа годзе калектыў становіцца лаўрэатам абласнога конкурсу аматарскіх аб’яднанняў, які праходзіў у г.Гарадок.
Колькасць удзельнікаў клуба – 15 чалавек. Узроставы склад разнастайны, але ўсе удзельнікі клуба маюць добрыя зносіны паміж сабою, з вялікай любоўю, цікавасцю, павагай адносяцца да народнай спадчыны. Кіраўнік клуба – Святлана Анатольеўна Карабань.
Дзейнасць клуба рознабаковая: песенны фальклор, народныя святы і абрадавыя дзеянні, традыцыйная народная кухня. Актыўна праводзяцца фальклорныя экспедыцыі па вёсках Лепельскага раёна, падчас якіх былі запісаны вясельныя, велікодныя, купальскія песні, фрагменты вясельнага і купальскага абрадаў. Аўтэнтычны матэрыял быў запісаны ад жанчын вёсак Слабодка, Слабада, Юркоўшчына Лепельскага раёна.
Удзельнікі гурта з задавальненнем вывучаюць традыцыі сваіх продкаў, падчас экспедыцый пераймаюць ад непасрэдных носьбітаў фальклору манеру спеваў, выкананне традыцыйных танцаў. Штогод калектывам праводзяцца тэатралізаваныя прадстаўленні да святаў народнага календара – Каляды, Купалле і інш. Традыцыйна праводзіцца гульня ”Жаніцьба Цярэшкі“, падчас якой адбываюцца майстар-класы па беларускім народным танцам.
У 2013 годзе клуб удзельнічаў у тэлевізійным творчым праекце ”Зорны шлях“. У 2015 годзе калектыў з фрагментам вясельнага абраду ”Перазовы“ прыняў удзел у абласным свяце вясельных абрадаў Віцебшчыны ”Вялікая вясельніца“ ў г.Дуброўна, дзе атрымаў дыплом ”За лепшае выкананне вясельных танцаў і гульняў“. На свяце ручніка ”Ручнік як лёс“ у межах Міжнароднага фестывалю мастацтваў ”Славянскі базар у Віцебску“ ў 2015 годзе атрымаў ІІ месца. Танцавальныя пары калектыву прымалі ўдзел у конкурсе беларускіх танцаў ”Мяцеліца“ (г.Мінск, 2013 г.) і ў турніры беларускіх народных танцаў у межах Міжнароднага свята традыцыйнай культуры ”Браслаўскія зарніцы“ (г.Браслаў, 2015г.).
У 2017 годзе калектыў прыняў удзел у абласным аглядзе-конкурсе вясельных абрадаў Віцебшчыны ”Вялікая вясельніца“ ў г.п. Ушачы, дзе прадставіў карагод вясельных гульняў і забаў Лепельшчыны. Гурт з’яўляецца лаўрэатам ІІ ступені абласнога агляду-конкурсу фальклорных калектываў вобласці ў межах абласнога фальклорнага форума (г. Лепель, 2017 г.). Танцавальныя пары ”Кругаверці“ – лаўрэаты ІІ ступені турніра побытавых танцаў у межах Міжнароднага фестывалю мастацтваў ”Славянскі базар у Віцебску“ (г.Віцебск, 2018 г.). На абласным аглядзе-конкурсе калектываў мастацкай творчасці і аматарскіх аб’яднанняў з найменнем ”народны, узорны“ ”Званне пацвярджаю“ гурт прадставіў фальклорную праграму ”Вясновыя забавы“.
Народны фальклорны клуб ”Кругаверць“ праводзіць няспынную актыўную дзейнасць сярод грамадзян рознага ўзросту па папулярызацыі беларускай мовы, вывучэнні абрадаў, звычаяў і традыцый малой радзімы, гісторыі Лепельскага краю.