
Кудзіна Ніна Сцяпанаўна
1948 г.н.
в. Домжарыцы, Лепельскі раён, Віцебская вобл.
Кудзіна Ніна Сцяпанаўна нарадзілася ў 1948 годзе ў в.Мінічы Свіслачскага раёна Гродзенскай вобласці. Скончыла школу, тэхнікум. Навучанне працягвала ў Беларускім тэхналагічным інстытуце, пасля заканчэння якога прыехала працаваць у Бярэзінскі запаведнік. З 1997 года па 2010 год працавала дырэктарам сельскага Дома народнай творчасці (в.Домжарыцы Лепельскага раёна).
Навыкі ткацкага рамяства Ніна Сцяпанаўна пераняла ад сваёй маці. З маленства яна прывыкла да звону кроснаў у бацькоўскай хаце. Яе ніколі не пакідала любоў да ткацкай справы. На цяперашні час яна валодае амаль усімі тэхнікамі шматнітовага ткацтва. Ніна Сцяпанаўна стварае цэлыя шэдэўры на сваіх кроснах. Яе рушнікі, посцілкі і шмат іншых рэчаў вядомы па ўсёй Беларусі. Яе кветачкі, птушкі, беларускія ўзоры яскрава граюць на льняных рушніках.
У сваіх вырабах Ніна Сцяпанаўна выкарыстоўвае розныя арнаменты ад простых слупкоў, шашачных і зубчастых узораў да складаных геаметрычных з прысутнасцю разетак, зорак, крыжападобных, рамбічных фігур, таксама выяў птушак, розных жывёл. Сатканыя ручнікі і посцілкі адрозніваюцца высокім тэхнічным майстэрствам і з’яўляюцца добрай школай для яе вучняў, якія працягваюць традыцыі ручнога ткацтва.
У 2002 годзе была прынята ў Беларускі саюз майстроў народнай творчасці. Неаднаразова падцвярджала сваё высокае прафесійнае майстэрства на гарадскіх, абласных, рэспубліканскіх выставах і конкурсах.
З’яўляецца дыпламантам: Усебеларускага фестывалю народнага мастацтва ”Беларусь – мая песня“ (1998 г.); кірмашу ”Горад майстроў“ у межах Міжнароднага фестывалю мастацтваў ”Славянскі базар у Віцебску“; рэспубліканскага свята ”Траецкі кірмаш“, ”Дажынкі“ (1999 г.); абласнога свята-конкурсу ткацтва ”Матчыны кросны“ ў намінацыі ”Ткацтва посцілкі“ (2003 г.); абласной выставы народнага мастацтва ”Жывая легенда“ (2005 г.); ІІ Нацыянальнай выставы народнага мастацтва ”Жывыя крыніцы“ (2006 г.); ”Ткацтва ручніка“ (2006 г., 2009 г.); рэспубліканскай выставы народнай творчасці ”Калядныя ўзоры“ (2004 г., 2009 г., 2010 г.) і інш.
Ніна Сцяпанаўна – стыпендыят дзяржаўнай стыпендыі 2009 года за стварэнне арыгінальнай калекцыі мастацкіх тканін у мясцовых традыцыях ткацтва. У 2011 годзе ёй прысуджаны статус народнага майстра Беларусі.




