| Фамін Арцём Мікалаевіч г.Глыбокае, Віцебская вобласць 1990 г.н. |
Фамін Арцём Мікалаевіч нарадзіўся ў г. Глыбокае Віцебскай вобласці. У 2008 годзе паступіў ў Віцебскі тэхналагічны каледж на аддзяленне дэкаратыўна-прыкладнога мастацтва. У 2012 годзе пасля заканчэння другой ступені навучання атрымаў спецыяльнасць ”мастак-педагог“. Пасля заканчэння каледжа Арцём Мікалаевіч працаваў на прадпрыемстве ААТ ”Белхудожкерамика“ ў г.п.Радашковічы. На гэтым прадпрыемстве ён атрымаў спецыяльнасць ганчара трэцяга разрада.
З 2014 года працуе ў Глыбоцкім Доме рамёстваў метадыстам па ганчарстве і ручной лепцы з гліны.
У 2015 годзе ўдзельнічаў у конкурсе традыцыйнай свістулькі ”Салавейка – 2015“ у межах Міжнароднага фестывалю песні і музыкі ”Дняпроўскія галасы ў Дуброўне“.
У 2016 годзе ў выставачнай зале Глыбоцкага Дома рамёстваў ладзілася першая персанальная выстава майстара ”Мінулае і сучаснае“, на якой дэманстраваліся дэкаратыўныя вырабы з гліны, традыцыйны посуд, свістулькі і акарыны. У гэтым жа годзе Арцём Мікалаевіч атрымаў раённую прэмію ”Лепшы майстар традыцыйных рамёстваў“.
Майстар дэманструе свае вырабы і праводзіць майстар-класы ў межах Міжнароднага фестывалю мастацтваў ”Славянскі базар у Віцебску“. Удзельнічае ў Рэспубліканскім свяце ”Вясновы букет“, якое праводзіцца ў г.Мінск. Яго вырабы можна ўбачыць на выставе падчас правядзення Міжнароднага свята ”Вішнёвы фестываль“ у г.Глыбокае і на раённых святах ”Квітней, Глыбоччына!“, ”Мядовы спас“.
Арцём Фамін прымае актыўны ўдзел у мерапрыемствах рознага ўзроўню: лаўрэат I ступені ў намінацыі ”Традыцыйны ганчарны выраб“ абласнога свята-конкурсу майстроў па кераміцы і ганчарству ”Гліна спявае“ ў межах XXVII Міжнароднага фестывалю мастацтваў ”Славянскі базар у Віцебску“ (2018 г.), лаўрэат ІІ ступені ў намінацыі ”Захаванне і развіццё ганчарскіх традыцый“ Міжнароднага плэнера па ганчарству (г.пКопысь (Аршанскага р-на, 2019 г.).
У 2020 годзе прыняты у Беларускі саюз майстроў народнай творчасці. За перыяд работы Арцём Мікалаевіч праявіў сябе як творчы і перспектыўны майстар. Ён самастойна вывучыў у фондах раённага гісторыка-этнаграфічнага музея глыбоцкую кераміку і аднавіў тагачасны гліняны посуд: смятаннік, бабачнік, спарыш. У асабістай калекцыі майстра ёсць падсвечнікі, дэкаратыўныя вазы, гаршкі, талеркі, кубкі, ”кухлі”. З задавальненнем праводзіць майстар-класы па ганчарству і ручной лепцы для дзяцей і дарослых не толькі Глыбоцкага краю, Віцебшчыны і Беларусі ўвогуле, але і для замежных гасцей.