| Дудкевіч Віктар Баляслававіч 1960 г.н. г.Глыбокае, Віцебская вобласць |
Дудкевіч Віктар Баляслававіч нарадзіўся ў 1960 годзе ў Браславе Віцебскай вобласці. Скончыў Кранштацкую мараходную школу. Працаваў у Мурманску, Браславе, на Глыбоцкім малочна-кансервавым камбінаце мастаком-афарміцелем. Адначасова вучыўся завочна ў Маскоўскім народным універсітэце мастацтваў імя Н.Крупскай у 1988-1991 гг.
З 2005 Віктар Баляслававіч працуе ў Глыбоцкім Доме рамёстваў годаметадыстам разьбы па дрэве. Рамяство асвоіў самастойна, цікавіцца гісторыей Глыбоччыны і гісторыяй дзіцячай драўлянай цацкі. Майстар стварыў макеты старадаўніх прылад для апрацоўкі дрэва,калекцыю драўляных цацак. Віктар Баляслававіч цікава арганізуе навучальны працэс у гуртку, які накіраваны на выяўленне і развіццё здольнасцей у дзяцей.
Майстар таксама займаецца жывапісам, працуе з прыроднымі матэрыяламі (бяроста, кара).У 2007 годзе адбылася персанальная выстава майстра ”Позірк, думкі…“, дзе Віктар Баляслававіч дэманстраваў карціны напісаныя алеем і дэкаратыўныя вырабы з дрэва. У 2012 годзе на свяце Дня пісьменства ў Глыбокім дэманстраваў рэканструіраваны друкарскі станок ХVІ ст., на якім ствараў народныя карцінкі рэлігійнай і гістарычнай тэматыкі. У гэтым жа годзе атрымаў Прэмію Глыбоцкага выканаўчага камітэта ў намінацыі ”Лепшы майстар традыцыйнай культуры“.У 2013 годзе ў выставачнай зале Глыбоцкага Дома ремёстваў ладзілася выстава майстра ”Скарбы старадаўняга куфара“. У 2017 годзе Віктар Дудкевіч стаў лаўрэатам І ступені свята-конкурсу майстроў разьбы па дрэве ”Дрэва жыцця-2017“ ХХVІ Міжнароднага фестывалю мастацтваў ”Славянскі базар у Віцебску“ ў намінацыі ”Развіццё традыцый народнай драўлянай цацкі“. У 2018 годзе была выдадзена кніга ”Забава: народная цацка і лялька Віцебшчыны“, ў якую ўвайшло імя Дудкевіча Віктара Баляслававіча, майстра па вырабе драўлянай цацкі.
Віктар Дудкевіч прадстаўляе свае творы на такіх фестывалях як:Міжнародны фестываль мастацтваў ”Славянскі базар у Віцебску“;Рэспубліканскі фестываль-кірмаш мастацкіх рамёстваў ”Вясновы букет“; свята сярэднявечча ”Меч Брачыслава“.
Вырабы майстра народных мастацкіх рамёстваў знаходзяцца ў фондах Глыбоцкага Дома рамёстваў, ДУ ”Віцебскі абласны метадычны цэнтр народнай творчасці“, прыватных калекцыях Беларусі, Літвы, Польшчы, Расіі, Германіі, Францыі, Ірландыі, Чэхіі.