16 жніўня 2025 года Шаркаўшчына стала цэнтрам абласнога свята аматарскіх аб’яднанняў “Яблычны фэст”, якое было прысвечана Году добраўпарадкавання.
У маштабным мерапрыемстве прынялі ўдзел больш за 200 чалавек, у тым ліку 41 аматарскі калектыў з 15 раёнаў Віцебскай вобласці, а таксама з Віцебска і Наваполацка. Удзельнікі рыхтавалі свае выступленні і работы ў чатырох намінацыях:
- “Цуды ў яблычным садзе” – прадстаўленне аматарскіх калектываў у розных жанрах, такіх як вакал, харэаграфія, тэатр, музыка і вусная народная творчасць;
- “Яблычны кірмаш” – выстава-дэманстрацыя страў і пачастункаў, прыгатаваных па унікальных рэцэптах рэгіёнаў;
- “Інтэрактыўны яблычны квэст” – паказ гульнявых праграм ад аматарскіх аб’яднанняў прама на пляцоўцы свята;
- “Яблычныя матывы” – выстава дэкаратыўна-прыкладнога мастацтва для аздаблення музея імя І.П.Сікоры.
У рамках “Яблычнага фэсту” адбыліся разнастайныя падзеі: мітынг “И помнит мир спасенный”, аўтапрабег “Дарогамі памяці і подзвігу”, канцэрт Нацыянальнага акадэмічнага народнага хору Рэспублікі Беларусь імя Г.І.Цітовіча, а таксама выступленні творчых калектываў з Пскоўскага раёна і Архангельскага рэгіянальнага навучальнага пошукавага цэнтра (Расійская Федэрацыя) і іншыя.
Акрамя таго, былі арганізаваны тэматычныя пляцоўкі: “Літаратурная альтанка”, “Дзівосны свет маляванкі” з удзелам музея імя Я.М.Драздовіча, раённых цэнтраў рамёстваў; перасоўная экспазіцыя “Наш абавязак памятаць” ад Беларускага дзяржаўнага музея гісторыі Вялікай Айчыннай вайны; выстава-прэзентацыя падворкаў сельскіх саветаў і арганізацый Шаркаўшчыны пад назвай “Яблычны перапалох”; выстава-прэзентацыя турыстычных інфармацыйных цэнтраў Віцебскага Паазер’я і многае іншае.
