У першы дзень масленічнага тыдня ў весцы Даўгаполле правялі традыцыйную масленічную гульню “Пахаванне дзеда”, унесеную ў дзяржаўны спіс гісторыка-культурных каштоўнасцей Рэспублікі Беларусь. Гэта гульня з’яўляецца адметным праяўленнем лакальнай культурнай традыцыі Гарадоччыны і арганічна ўваходзіць у масленічны абрадавы комплекс. Гульня носіць гумарыстычны характар, уяўляе сабой сваеасаблівую пародыю і скіравана на выхад эмоцый, псіхалагічную разрадку прысутных праз смех. Вобраз “Дзеда”, яго “смерць” сімвалізуюць заканчэнне зімы і надыход вясны. Для гульні вырабляецца спецыяльная лялька ў рост чалавека, якая апранаецца ў мужское адзенне і кладзецца на кут. У час гульнёвай дзеі яе ўдзельнікі актыўна кантактуюць між сабой, распавядаюць пра рысы характару і факты з жыцця ”Дзеда”. Затым адбываецца “пахаванне”. Фінальнай кропкай гульні становяцца “памінкі”, якія перарастуць у вясёлае застолле з жартамі, песнямі ды прыпеўкамі.Усё гэта сімвалізуе перамогу цяпла над холадам, развітанне з зімой, увасобленай ў вобразе “Дзеда”, а яго “пахаванне” успрымаецца неабходнай ўмовай для адраджэння прыроды вясной.
