Шынкарова Таццяна Васільеўна

Шынкарова Таццяна Васільеўна нарадзілася ў 1967 годзе, у 1990 г. скончыла Ленінградскі электратэхнічны інстытут імя У.І.Ульянава (Леніна) па спецыяльнасці ”Электраабсталяванне судоў“. Свой працоўны шлях пачала інжынерам на суднабудаўнічым заводзе ў г.Рыбінску Яраслаўскай вобласці, дзе першы раз пазнаёмілася з глінай у студыі народнай творчасці па лепцы. З 1995 г. працуе ў ДУК ”Аршанскі Дом рамёстваў“, з’яўляецца ўдзельнікам Аршанскага клуба майстроў.

Таццяна Васільеўна першай у горадзе Оршы пачала дасканала і на прафесійнай аснове адраджаць ганчарную справу, старанна вывучаючы старадаўнія тэхналогіі, вопыт майстроў. Валодае навыкамі і сакрэтамі абварной, задымленай керамікі, тэхнікай размалёўкі ангобамі і глазурай. У дасканаласці асвоіла працу на ганчарным крузе, на якім выкручвае чыгуны, глякі, спарышы, кружкі, міскі, гладышы, бутлі. Майстар таксама асвойвае тэхнікі: пляцення з рагозы, традыцыйны гафт, ткацтва, роспіс па тканіне, шкле і дрэве. Свой бясцэнны вопыт перадае дзецям, якія наведваюць гурток керамікі ў Аршанскім Доме рамёстваў. У 2020 годзе была прызнана майстрам-носьбітам нематэрыяльнай культурнай спадчыны па вырабу глінянай цацкі.

Актыўны ўдзельнік культурнага жыцця горада, выставак, кірмашоў, конкурсаў, фестываляў розных узроўняў: кірмашу рамёстваў ”Горад майстроў“ у межах Міжнароднага фестывалю мастацтваў ”Славянскі базар у Віцебску“, свяце-кірмашу працаўнікоў вёскі ”Александрыя збірае сяброў“, свяце-конкурсе ”Салавейка“ ў рамках Міжнароднага фестывалю песні і музыкі ”Дняпроўскія галасы ў Дуброўне“ і інш.

У 2019 і 2021 гг. стала лаўрэатам I ступені ў намінацыі ”Лепшы выраб дэкаратыўнай глінянай пластыкі“ ў межах Міжнароднага пленэру дэкаратыўна-прыкладнога мастацтва ”Гліна спявае“ (г.п.Копысь).

У 2022 годзе Шынкаровай Т.В. нададзены статус народнага майстра Беларусі.