Сцержанкова Наталля Аляксандраўна
1979 г.н.
г.п. Шуміліна, Віцебская вобл.
Сцержанкова Наталля Аляксандраўна нарадзілася ў в.Палата Полацкага раёна ў 1979 годзе. Скончыла Полацкае ПТВ №2 па спецыяльнасці ”кравец- закройшчык“. Працуе майстрам народных мастацкіх рамёстваў па саломапляценні ў Шумілінскім доме рамёстваў з 1999 года, з’яўляецца членам народнай студыі майстроў народных мастацкіх рамёстваў ”Спадчына“.
Майстар займаецца адраджэннем, захаваннем і далейшым развіццём рамяства саломапляцення, традыцыйнага для Шумілінскага рэгіёну. У яе творчасці прасочваюцца як традыцыйныя, так і сучасныя мастацкія напрамкі. Яна выдатна валодае рознымі тэхнікамі: аплікацыя, саламяная пластыка, абрадавыя вырабы, утылітарныя прадметы, саламяныя павукі. Майстар стварае працы рознага ўзроўню складанасці: саламяныя кветкі, лялькі, рытуальныя маскі, сухарніцы, падносы, пано, падвескі, абярэгі, галаўныя ўборы.
Асаблівае месца ў творчасці Наталлі Аляксандраўны займаюць саламяныя павукі. Вырабам гэтых абярэгаў захапілася з самага пачатку працы ў Доме рамёстваў. За ўвесь гэты час яна вырабіла больш за сто саламяных павукоў, якія знаходзяцца не толькі ў калекцыі Дома рамёстваў, але і за мяжой. Першыя свае работы майстар рабіла па матэрыялах этнаграфічных экспедыцый, капіруючы шарападобных і рамбічных павукоў Сакаловай Гані Цімафееўны.
Вялікую ўвагу Наталля надае сэнсавай нагрузцы гэтых традыцыйных для Шуміліншчыны абярэгаў. Кожны выраб зроблены для пэўнага чалавека ці выпадку і мае сваё прызначэнне. Яна аднавіла ўсе віды традыцыйных для Шуміліншчыны саламяных павукоў. Высокі прафесіяналізм майстра дазваляе ёй аднаўляць вырабы па этнаграфічных матэрыялах, фатаграфіях з музеяў.
Сцержанкова Наталля не толькі захавала традыцыйную тэхналогію вырабу павукоў, але і надала ёй новы напрамак. Яна стварыла серыю мобіляў – маленькіх настольных павучкоў-абярэгаў. Прызначэнне мобіляў, як і саламяных павукоў, – гарманізаваць прастору, абараняць уладальніка ад негатыўнага ўплыву, ствараць добрую атмасферу і дапамагаць адпачыць.
Шмат намаганняў прыкладае майстар для распаўсюджвання рамяства саломапляцення сярод насельніцтва раёна. Рыхтуюцца сустрэчы з вучнямі школ, праводзяцца гутаркі, майстар-класы, урокі народнай творчасці.
Наталля Аляксандраўна – пастаянны ўдзельнік раённых, абласных, рэспубліканскіх і міжнародных мерапрыемстваў. Прымала ўдзел у святочных мерапрыемствах, прысвечаных Дням Віцебскай вобласці на ВДНГ (г.Масква, 2024 г.); у XI Форуме рэгіёнаў Беларусі і Расіі (г.Віцебск, 2024 г.); выставе ”Чым багаты, тым i рады“ ў рамках XXIII Нацыянальнага фестывалю беларускай песні і паэзіі ”Маладзечна – 2024“; у канферэнцыі-прэзентацыі элементаў нематэрыяльна-культурнай спадчыны Віцебскай вобласці, якія ўвайшлі ў Дзяржаўны спіс Рэспублікі Беларусь ”Шматгранная народная творчасць“ (г.Пскоў, 2024 г.); у свяце рамёстваў ”Горад майстроў“ у межах Міжнароднага фестывалю ”Славянскі базар у Віцебску“ на працягу 20 гадоў.
За асабісты ўклад у развіццё народных рамёстваў і высокія дасягненні ў рабоце майстар узнагароджана шматлікімі граматамі і дыпломамі (лаўрэат I ступені ў намінацыі ”Саламяны павук“ адкрытага абласнога свята-конкурсу ”Папараць-кветка“ ў межах XXXIII Міжнароднага фестывалю ”Славянскі базар у Віцебску“ (2024 г.) і інш).
У 2021 годзе Наталлю Аляксандраўну прынялі ў Беларускі саюз майстроў народнай творчасці. У 2022 годзе атрымала статус народнага майстра Беларусі.
