Сарбаш Алеся Леанідаўна

Сарбаш Алеся Леанідаўна нарадзілася ў 1980 годзе ў горадзе Віцебску. У 2003 г. скончыла Віцебскі дзяржаўны прафесійна-тэхнічны каледж, аддзяленне  дэкаратыўна-прыкладнога мастацтва, дзе атрымала сярэдне-спецыяльную адукацыю.  З 2003 г. працавала кіраўніком гуртка па кераміцы ў Доме культуры ў аг.Акцябрская. З 2004 г. з’яўлялася майстрам па мастацкай кераміцы ў філіяле ”Цэнтр рамёстваў ”Адраджэнне“ ДУК ”Віцебскі раённы цэнтр культуры і творчасці“. З 2025 г. – загадчык філіяла Цэнтра рамёстваў “Адраджэнне”.

Кіруе дзіцячым калектывам дэкаратыўна-прыкладнога мастацва ”Гліняныя скарбы“, знаёміць удзельнікаў гуртка з гісторыяй і традыцыямі беларускай керамікі.

Асноўным напрамкам работы майстра з’яўляецца мастацкая кераміка. Асаблівую ўвагу надае стварэнню арыгінальных дэкаратыўна-прыкладных вырабаў, дробнай пластыцы, цацкам, свістульцы, увасабленню ў гліне жанравых сцэн беларускага побыту, традыцыйным казачным, гістарычным сюжэтам, мультыплікацыйным вобразам.

Вырабіла калекцыю традыцыйных свістулек, арыгінал якіх быў знойдзены на рацэ Вымнянка і выраблены майстрам Разважным Якавам у пачатку XX ст. У 2020 г. свістулькі Віцебскага раёна, адноўленыя Алесяй Леанідаўнай, увайшлі ў Дзяржаўны спіс гісторыка-культурных каштоўнасцей Рэспублікі Беларусь як ”Традыцыйныя вобразы і тэхналогія вырабу глінянай свістулькі Віцебскага раёна Віцебскай вобласці“.

Алеся Леанідаўна з’яўляецца пастаянным удзельнікам міжнародных, абласных, раённых, гарадскіх выстаў дэкаратыўна-прыкладной творчасці, кірмашоў і фестываляў:  II месца ў намінацыі ”Лепшая хатняя калекцыя“  на адкрытым абласным свяце-конкурсе народнай цацкі і лялькі ”Забава – 2021“; лаўрэат I ступені ў намінацыі ”Дэкаратыўна-прыкладное мастацтва“ ў межах II Міжнароднага фестывалю-конкурсу народнай культуры ”Русское Диво“ (г.Масква); дыплом лаўрэата III ступені ў намінацыі ”Лепшая гліняная цацка“ ў Міжнародным пленэры дэкаратыўна-прыкладнога мастацтва ”Гліна спявае“ (г.п.Копысь, 2023 г.); лаўрэат I ступені ў намінацыі ”Традыцыйная свістулька“ на свяце-конкурсе традыцыйнай свістулькі ”Салавейка“ ў межах фестывалю мастацтваў ”Славянскі базар у Віцебску“ (г.Віцебск, 2024 г.); лаўрэат I ступені ў намінацыі ”Лепшы выраб дэкаратыўнай глінянай пластыкі“ ў Міжнародным пленэры дэкаратыўна-прыкладнога мастацтва ”Гліна спявае“ (г.п.Копысь, 2024 г.).

Па выніках працы за 2023 год Сарбаш А.Л. была занесена на ганаровую дошку Віцебскага райвыканкама. У снежні 2024 года Алесі Леанідаўне быў нададзены статус ”Народны майстар Рэспублікі Беларусь“.