Кутузава Галіна Міхайлаўна

Кутузава Галіна Міхайлаўна нарадзілася ў 1973 годзе ў горадзе Валгаградзе (РСФСР), але большую частку свайго жыцця жыве ў Рэспубліцы Беларусь. Пасля заканчэння 9 класаў сярэдняй школы паступіла ў Аршанскае педагагічнае вучылішча на спецыяльнасць ”настаўнік пачатковых класаў“. Цікавасць да рукадзелля развівалася з дзяцінства. Першым настаўнікам па шыццю і вышыўцы з’явілася бабуля, потым Галіна самастойна авалодвала шматлікімі відамі і тэхнікамі рамёстваў. Майстар валодае наступнымі відамі традыцыйных рамёстваў: вышыўка ніткамі рушнікоў і аддзення (розныя тэхнікі), ткацтва паясоў на дошчачках і бярдзе, реканструкцыя і шыццё народнага касцюма, вязанне спіцамі і гаплікам, выраб упрыгожванняў з бісера і каменняў (пляценне і ткацтва бісерам), макрамэ, кераміка.

З 1999 года з’яўляецца ўдзельнікам народнага клуба народных майстроў ДУК ”Аршанскі Дом рамёстваў“, а з 2001 года працуе ў ДУК ”Аршанскі Дом рамёстваў“ кіраўніком кружка па ткацтву паясоў, вышыўцы рушнікоў і адзення. Акрамя гэтага рэгулярна праводзіць майстар-класы па пляценні з бісера, ткацтву, вышыўцы і вязанню. У майстра ёсць шмат вучняў і паслядоўнікаў. Усе вырабы Галіны Міхайлаўны выкананы з вялікім майстэрствам, вельмі акуратна і з густам. Аб таленту майстра шмат артыкулаў у розных друкаваных выданнях (кнігі, газеты, часопісы), зняты і тэлевізійныя сюжэты.

З 2001 года Галіна Кутузава з’яўляецца членам ГА ”Беларускі саюз майстроў народнай творчасці“. Майстар прымае актыўны ўдзел у гарадскіх, абласных, рэспубліканскіх, міжнародных мерапрыемствах, кірмашах, выставах, фестывалях. Неаднаразова станавілася пераможцам конкурсаў, атрымлівала ўзнагароды. Сярод іх: дыплом ІІ ступені ў конкурсе ”Матчыны кросны“ (г.Лепель, 2007 г.), дыплом за І месца ў свяце-конкурсе ”Чароўная нітка“ ў межах ХII Міжнароднага фестывалю мастацтваў ”Славянскі базар у Віцебску“ (г.Віцебск, 2008 г.), дыплом ІІ ступені ў намінацыі ”Творы народных майстроў“ конкурсу творчых работ (г.Мінск, 2021 г.), дыплом лаўрэата ІІ ступені ў намінацыі ”Віццё, пляценне і ткацтва паясоў“ Міжнароднага конкурсу майстроў традыцыйнага ткацтва ”Палатняныя пераплёты – 2022“ (г.Віцебск), дыплом лаўрэата І ступені ў намінацыі ”Рэканструкцыя вырабленага ў тэхніцы вытокі артэфакта“ абласнога свята-конкурсу майстроў вышыўкі і карункапляцення ”Чароўная нітка – 2023“ у межах ХХХІІ Міжнароднага фестывалю мастацтваў ”Славянскі базар у Віцебску“.

Вырабы Кутузавай Г.М. знаходзяцца ў асабістых калекцыях як у рэспубліцы, так і за яе межамі. Майстрам зроблены народныя касцюмы для музычных калектываў і індывідуальных выканаўцаў. У межах акцыі ”Майстры ХХІ стагоддзя“ работы ”Водяной“ і ”Русалка“, якія выкананы ў тэхніцы вышыўкі ніткамі (крыж), былі прэзентаваны этнаграфічнаму музею ”Млын“ у горадзе Оршы.

З 2023 года мае статус народнага майстра Беларусі.