Квашко Уладзімір Іванавіч

Квашко Уладзімір Іванавіч
1967 г.н.
г. Сянно
, Віцебская вобл.

Квашко Уладзімір Іванавіч нарадзіўся ў 1967 годзе ў г.Рамны Сумскай вобласці (Украіна).

Зараз з’яўляецца майстрам па кераміцы Сенненскага Дома рамёстваў, носьбітам традыцый элемента нематэрыяльнай культурнай спадчыны Беларусі ”Глухароўская свістулька“. Валодае наступнымі відамі творчай дзейнасці: роспіс, кераміка, ганчарства, жывапіс, набойка.

У 2007 годзе падчас экспедыцыі ў пасёлак Труд (Сенненскі раён) майстар сабраў матэрыял аб жыцці і дзейнасці Генадзя Пятровіча     Глухарова – самабытнага ганчара, аўтара мясцовай традыцыйнай глінянай цацкі. За апошнія дваццаць гадоў дзейнасці Квашко У.І. поўнасцю адноўлена тэхналогія вырабу ўсіх сямі вобразаў традыцыйнай глінянай цацкі Сенненскага рэгіёну і створана значная калекцыя глінянай свістулькі ў адпаведнасці з мясцовымі традыцыямі. Уладзімір Іванавіч авалодаў старажытным рамяством і ахвотна дзеліцца сакрэтамі майстэрства з дарослымі і дзецьмі. Майстар рэгулярна праводзіць майстар-класы па ”Глухароўскай свістульцы“ – візітнай картцы Сенненскага раёна. Ім распрацаваны і зроблены ”брэндавыя“ сувенірныя вырабы з гліны.

Уладзімір Квашко з’яўляецца пастаянным удзельнікам, дыпламантам і прызёрам шматлікіх выстаў і конкурсаў раённага, абласнога і рэспубліканскага ўзроўняў: свята-конкурсу традыцыйнай свістулькі ”Салавейка“ ў межах Міжнароднага фестывалю песні і музыкі Падняпроўя ”Дняпроўскія галасы ў Дуброўне“ (2015-2021 гг.),  Міжнароднага конкурсу майстроў традыцыйнага і сучаснага мастацкага роспісу ”Фарбы нябёсаў“ і Міжнароднага свята-конкурсу майстроў народнай цацкі і лялькі ”Забава“ ў межах Міжнароднага фестывалю мастацтваў ”Славянскі базар у Віцебску“, конкурсу сямейнай творчасці ”Свет вашаму дому“ (г.Докшыцы, 2021 г.)., абласной інтэрактыўнай выставы-конкурсу мастацкіх вырабаў ”Птушыны перапалох“, выставы-конкурсу па дэкаратыўна-прыкладным мастацтве ”Велікодныя ўзоры“ (г.Віцебск, 2022 г.), абласной выставы набіванкі ”Віцебская набойка“ (г.Віцебск, 2024 г.), рэспубліканскага свята ”Купалле“ (”Александрыя збірае сяброў“), рэспубліканскага фестывалю-кірмашу народных мастацкіх рамёстваў ”Вясновы букет“ (г.Мінск, 2022 г., 2024 г.) і інш.

Квашко У.І. з’яўляецца членам грамадскага аб’яднання ”Беларускі саюз майстроў народнай творчасці“. У 2022 годзе атрымаў званне народнага майстра Беларусі.