Карнеева Таццяна Гардзееўна

Карнеева Таццяна Гардзееўна, 1978 года нараджэння, беларуска, адукацыя вышэйшая. Працуе ў Глыбоцкім Доме рамёстваў з 1999 года. З чэрвеня 2022 года займае пасаду загадчыка філіяла №2 Глыбоцкага дома рамёстваў ДУК ”Глыбоцкая цэнтралізаваная клубная сістэма“. Асноўнымі напрамкамі дзейнасці з’яўляюцца: вывучэнне і аднаўленне асаблівасцяў рэгіянальнага касцюма Глыбоцкага края, вывучэнне асаблівасцяў рэгіянальнай вышыўкі і карункапляцення.

Пачынаючы з 2015 года, Таццяна Гардзееўна працавала над стварэннем калекцыі касцюмаў у складзе творчага калектыву Глыбоцкага дома рамёстваў, даследвала асаблівасці вышыўкі і ткацтва на Глыбоччыне. У 2016 годзе яна падрыхтавала метадычныя распрацоўкі: ”Метадычны дапаможнік па чатырохнітовым ткацтве ”дымка“ (з вопыту Глыбоцкага дома рамёстваў)“; ”Выкарыстанне ручнікоў на Глыбоччыне“; ”Ручнікі Глыбоччыны: рэгіянальныя адметнасці“. У 2018 годзе падрыхтавала метадычныя распрацоўкі: ”Паясы Глыбоччыны: рэгіянальныя адметнасці“, ”Сарочкі і фартухі ў жаночым і дзявочым касцюме на Глыбоччыне“; ”Святочны жаночы строй (канец ХІХ – пачатак ХХ ст.)“. У 2019 годзе падрыхтавала інфармацыю ”Творчы праект: Ткацтва хусткі (рэпліка музейнага экспаната КП-773)“.

У 2017 годзе ў складзе творчага калектыву працавала над стварэннем калекцыі верхняга адзення для ўдзелу ў абласной выставе-конкурсе народнага касцюма ”Сцяжкі майстэрства – 2017“, у выніку калектыў Глыбоцкага дома рамёстваў (Карнеева Т.Г., Байкова В.В., Логвін В.М., Міхайлоўская А.М.) быў узнагароджаны дыпломам Гран-пры.

У кастрычніку 2017 года Таццяна Гардзееўна ўдзельнічала ў Міжнародным навуковым форуме ”Традыцыйны беларускі касцюм у еўрапейскім культурным асяроддзі“, які праходзіў у цэнтры даследванняў беларускай культуры, мовы і літаратуры аддзела старажытнабеларускай культуры НАН Беларусі (г.Мінск). Праводзіла майстар-класы па традыцыйных відах рамёстваў.

Карнеева Т.Г. прымала ўдзел у шматлікіх фестывалях і выставах міжнароднага, рэспубліканскага, абласнога і раённага ўзроўняў. На яе творчым рахунку шмат узнагарод: дыплом лаўрэата І ступені ў намінацыі ”Майстар-клас па адраджэнні лакальных і рэгіянальных традыцыйных тэхналогій у вырабе пэўнага рэгіёну“ ў рамках Міжнароднага свята мастацтваў ”Славянскі базар у Віцебску“ (2021 г.); дыплом ”За адраджэнне і захаванне традыцыйнай тэхналогіі ткацтва паясоў Віцебшчыны“ ў абласным свяце-конкурсе вясельных абрадаў Віцебшчыны ”Вялікая вясельніца – 2021“; дыплом І ступені ў намінацыі ”Паазерска-падзвінскі этнастыль“ абласнога свята-конкурсу майстроў вышыўкі і карункапляцення ”Чароўная нітка – 2023“ у межах ХХХІІ Міжнароднага фестываля мастацтваў ”Славянскі базар у Віцебску“ (разам з майстрамі Глыбоцкага раёна); дыплом ІІ ступені ў намінацыі ”Лепшы аўтарскі твор, выраблены ў тэхніцы пляцення (вязанне, карункапляценне, пляценне на раме і інш.“ у межах абласной выставы-конкурсу па вясковаму і местачковаму інтэр’ернаму тэкстылю Віцебшчыны ”У роднай хатцы на падлозе: ходнікі, дарожкі, дыванкі“ і інш. У 2023 годзе прымала ўдзел у рэалізацыі рэспубліканскага праекта ”Культурная спадчына Беларусі“ па вышыўцы пано ”Карта Беларусі“.

Карнеева Т.Г. атрымала дыплом за супрацоўніцтва ў сферы культуры і актыўны ўдзел у этнакультурным конкурсе ”Диалог культур“ у межах рэалізацыі праекта ”Дружба и братство народов – залог возрождения России“ ў намінацыі ”Национальный костюм“. Онлайн-супрацоўніцтва адбылося з муніцыпальнай установай ”Цэнтральная бібліятэка муніцыпальнага ўтварэння гарадской акругі ”УХТА“, у рамках якога было прадстаўлена відэа майстар-класа па спосабу павязвання хусткі з в.Калечполе Псуеўскага сельсавета.

У 2023 г. Карнеевай Т.Г. прысвоены статус народнага майстра Беларусі.