Кавальчук Людміла Мікалаеўна

Кавальчук Людміла Мікалаеўна нарадзілася ў 1955 годзе, скончыла Абрамцаўскае мастацка-прамысловае вучылішча імя В.М.Васняцова (1976 г.) і Мінскі ўніверсітэт культуры (1994 г.). З 1987 года з’яўляецца членам Беларускага саюза мастакоў.

З 2006 года Кавальчук Л.М. працуе ў ДУ ”Культурна-гістарычны комплекс ”Залатое кола горада Віцебска ”Дзвіна“ метадыстам па кераміцы, майстрам віцебскай керамікі (з 2008 года), а з 2011 года і па цяперашні час майстрам народных промыслаў (рамёстваў).

Творчая дзейнасць Людмілы Мікалаеўны накіравана на захаванне і развіццё традыцыйных рамёстваў Віцебшчыны. Майстар спецыялізуецца на працы з глінай: роспіс па сырой эмалі, ручная лепка, стварэнне дэкаратыўных формаў, надпаліваны і падпаліваны роспіс і інш. У выніку шматгадовай даследчай працы па аднаўленні дэкаратыўна-прыкладнога мастацтва, разнавіднасці керамікі ”Віцебская маёліка“, у 2019 годзе створана печ-камін, дзе выкарыстана тэхналогія па вырабе віцебскай кафлі XVII стагоддзя з археалагічных раскопак. Роспіс па сырой эмалі, так званая ”Віцебская маёліка“, быў прыкметнай з’явай яшчэ ў XVII – XVIII стагоддзях і ўяўляў адзін з відаў дарагой высакаякаснай прадукцыі.

У 2021 годзе Людміла Мікалаеўна атрымала Грант Прэзідэнта Рэспублікі Беларусь на рэалізаванне праекта ”Віцебская маёліка. Роспіс па сырой эмалі“.

У творчых працах Кавальчук Л.М. бачны стыль і індывідуальнасць, што надае яе працам непаўторны характар і арыгінальнасць. Гэтак жа ў працах прысутнічае дакладнасць і выразнасць формаў, пластычнасць, лаканізм, кампактнасць, а галоўнае – ярка выяўленыя нацыянальныя асаблівасці. Аўтарскі стыль пазнаецца з першага погляду ў кожным асобным творы. Высокі прафесіяналізм і вялікі творчы вопыт дазваляе ёй не толькі лёгка арыентавацца ў свеце мастацкіх формаў, але і з бачнай лёгкасцю ажыццяўляць свае праекты, дэманстраваць актыўную мастацкую пазіцыю.

Працы Людмілы Кавальчук як мастака і майстра шырока вядомыя не толькі ў Рэспубліцы Беларусь, але і за яе межамі. Яны экспанаваліся ў Празе, Маскве, Мінску, Віцебску, знаходзяцца ў Нацыянальным мастацкім музеі Рэспублікі Беларусь, музеях Гомеля, Магілёва, Віцебска, у сховішчах Мастацкага фонду Саюза мастакоў Расіі (г.Масква), у прыватных калекцыях ЗША, Швецыі, Германіі. У фондзе Віцебскага мастацкага музея захоўваецца 84 музейных прадметы.

Прымае ўдзел у конкурсах і выставах па традыцыйных відах рамёстваў. У 2018 годзе была ўзнагароджана дыпломам лаўрэата II ступені ў намінацыі ”Дасканалае валоданне рамеснай тэхналогіяй і паспяховае правядзенне майстар-класа па адноўленым рамястве“ на абласной выставе-конкурсе рэдкіх і забытых рамёстваў ”Традыцыя ў сучаснасці“. У 2020 годзе Кавальчук Л.М. стала пераможцам і ўладальнікам дыплома лаўрэата I ступені міжнароднага конкурсу майстроў традыцыйнага і сучаснага мастацкага роспісу ”Фарбы нябёсаў“ у межах ХХІХ Міжнароднага фестывалю мастацтваў ”Славянскі базар у Віцебску“. У 2021 годзе атрымала дыплом лаўрэата І ступені Міжнароднага свята-конкурсу майстроў народнай цацкі і лялькі ”Забава“ ў межах ХХХ Міжнароднага фестывалю мастацтваў ”Славянскі базар у Віцебску“.

Людміла Мікалаеўна на працягу многіх гадоў з’яўляецца членам журы абласнога свята-конкурсу майстроў народных мастацкіх рамёстваў па традыцыйнай свістульцы ”Салавейка“ ў межах Міжнароднага фестывалю ”Дняпроўскія галасы ў Дуброўне“, перадае сакрэты свайго майстэрства ўдзельнікам рэспубліканскіх і абласных семінараў-практыкумаў, конкурсаў, святаў і фестываляў.

За шматгадовую і плённую працу Кавальчук Л.М. была ўзнагароджана Ганаровай граматай аддзела культуры Віцебскага гарадскога выканаўчага камітэта (2010), Ганаровай граматай Галоўнага ўпраўлення ідэалагічнай работы культуры і па справах моладзі Віцебскага абласнога выканаўчага камітэта (2015), падзякай старшыні Віцебскага гарадскога выканаўчага камітэта (2019), падзякай старшыні Віцебскага абласнога выканаўчага камітэта (2020).

У 2022 годзе атрымала статус народнага майстра Беларусі.